උන්මාද නිම්නය

බල්ලන් දෙදෙනා බිම වැටී සිටින අයෙකු අසළ

කැරකෙමින් බුර හැලෙමින් සිටියහ. ඒ අසළට ළං

වූ රජිත හා වසන්ති දුටුවේ බිමවැටී සිටින තරුණියකි.

"දෙයියනේ.. සොහානි..." වසන්ති කෑ ගසාගෙන

ඇය අසළට දිව ගියාය.

"දුවේ දුවේ.... ඇය කෑ ගසන්නට වූවාය.

රජිත ද වේගයෙන් ඔවුන් අසළට ළං වූයේය.

සොහානිගේ ගෙලෙන් රුධිරය ගලා එමින් තිබිණි.

රජිත එදෙස බලා සිටියේ බියපත් නෙතිනි.

'' ඉක්මණට හොස්පිට්ල් අරන් යන්...”

පියවි සිහියට එළඹි ඔහු, සොහානි ඔසවන්නට

තැත් කළේය. එහෙත් ඒ මොහොතේම ටෝබි

ගොරවමින් ඔහු වෙත කඩා පැන්නේය.

“මොකද ටෝබි වෙලා තියෙන්නේ.. පලයන්

පැත්තකට..”.

රජිත බල්ලා පසෙකට තල්ලු කළත් ඌ එවිටම

ඔහුගේ අත හපා කැවේය.