දීග නොගිය මනමාලිය

"සිය මව බිම ඇද වැටෙන බව දුටු එඩිත් ඇයට උදවු කිරීම පිණිස සිය මහේශාක්‍ය බව හා සුන්දරත්වය අත්හැර දමා වහා ඇය කරා දිව ගියාය. මගේ දෙමාපියන් වෙත බැල්මක් හෙලු මට දක්නට ලැබුණේ මගේ මව සිය දෙවැලමිට මේසය මත රුවාගෙන දෙඅත්ල තුළ සිය මුහුණ සඟවාගෙන සිටින බවකි. මගේ පියා දහඩිය වගුරුවමින් සිටියා නොව දහඩිය ගංගාවක ගිලී සිටියේය. මා අසිහි තත්ත්වයට පත්වූහ යි කීම එම වචනයට කෙරෙන අසාධාරණයකි. මගේ හිස එහාටත් මෙහාටත් කැරකෙන්නට විය. ඒ මා අවට සිදුවන සියල්ල යථා පරිදි එසැණින් ග්‍රහණය කර ගැනීම සඳහාය එහෙත් සිදුවන කිසිවක අගක් මුලක් වටහා ගැනීමට මම අපොහොසත් වීමි කිසියම් කරුණක් සම්බන්ධයෙන් හිත හදාගත් මිනිසකු ලෙසින් එඩිත්ගේ පියා නැගිට අප හිඳගෙන සිටි දෙසට බර අඩි තබමින් එන්නට විය. තාමත් හිඳගෙන සිටි මගේ පියා ඉදිරියට ආ ඔහු මගේ පියාගේ අත තදින් අල්ලා අසුනෙන් නැගිට්ටුවේය.