නොනිමි සිත්තම කේ. ජයතිලකගේ නවකතාවල මෙන්ම කෙටිකතාවලද චරිත චක්‍රය ඉතා පුළුල්ය. මැති ඇමතිවරු හොරු තක්කඩි, ගුරුවරු, භික්ෂුහු, ගොවියෝ, කම්කරුවෝ, දොස්තරවරු, නීතිඥයෝ ආදී වශයෙන් නගරයෙහිත් ගමෙහිත් නොයෙකුත් සමාජතලවලට අයත් බාල මහලු ස්ත්‍රී පුරුෂයෝ එහි වෙසෙති. විවිධාකාරයට සිතන මතන, ජීවත්වන මේ චරිත සමූහයාගේ තවත් පෘථුල වීමක් මේ කෙටිකතා සංග්‍රහයෙහි දක්නට ලැබේ. අධිරාජයෙකුගේ පටන් ගුබ්බෑයමක කසිප්පු විකිණීමෙන් ජීවත්වන මිනිසුන් දක්වා වූ තවත් චරිත කිහිපයක් මෙහිලා නිරූපණය කෙරෙයි.