සදත් විල මහා සුභද්‍රාවෝ

සේන තෝරදෙනිය

සේන තෝරදෙනිය විසින් රචිත, 2004 දී රාජ්‍ය සාහිත්‍ය සම්මානය දිනා ගත් ‘සදත් විල මහා සුභද්‍රාවෝ’ නමැති නවකතාව මෙසේ යළි පළවන්නේ වසර දහතුනකට පසුවය. මෙය පළවූයේ, අත්‍යාධික වශයෙන් යුරෝපීය හා බටහිර විලාසයන් මගින් සිංහල සාහිත්‍ය ක්‍ෂෙත්‍රයේ ව්‍යාකූලත්වයක් ඇති කරන ලද වකවානුවකදීය. සමකාලීන සිංහල නවකතාව අපට උරුම වූ පැරණි ගද්‍ය සම්ප්‍රදායෙන් අනුප්‍රාණයක් ලබාගෙන, ඒ පැරණි ගතිකත්වයේ ස්මෘතිය උපදවීමට සමත් විය යුතු, අපේ නවකතාවේ යථාභූත වූ ශ්‍රී ලාංකිකභාවයක් ඇති කිරීමට පියවර ගතයුතු වූ කාලයකදීය.

නව ආකාරයේ වස්තු විෂයක්, ආඛ්‍යානයක්, අන්තර්ගතයක් හා භාෂා ව්‍යවහාරයක් රැගත් ‘සදත් විල මහා සුභද්‍රාවෝ’ සම්භාව්‍ය සිංහල සාහිත්‍යයේ අධ්‍යාන රටාව, ගද්‍ය ශෛලිය හා බස්වහර සිහි ගන්වයි. උඩරට ගැමි සමාජ ක්‍රමය හා සම්ප්‍රදායයන් පෙන්නුම් කරන එය මාතෘත්වයේ භූමිකාව මෙන්ම ස්ත්‍රීත්වයේ භූමිකාව මනා ලෙස විදහා දක්වයි. එහෙයින් එය මාතෘත්වය හා ස්ත්‍රීත්වය වෙනුවෙන් ගයන ලද ස්තෝත්‍ර ගීතිකාවක් වැන්න.