නාද සිත්තම්

ප්‍රතිභා පූර්ණ සංගීතඥයකු වීම එකකි. එම විෂය පිළිබඳ ව බුද්ධිමත් ව විශ්ලේෂණාත්මක ව සාකච්ඡා කිරීමේ හැකියාව ලැබීම තවෙකකි. මේ දෙක එක් ව පිහිටනුයේ කලාතුරකිනි. අමරදේවයන් තුළ මේ දුර්ලභ සංයෝගය මැනවින් පිහිටියේ වෙයි. අග්‍රගණ්‍ය සංගීතඥයකු වන තරමට ම හේ සංගීතය පිළිබඳ බොහෝ ඇසූ පිරූ තැන් ඇත්තෙක් ද වේ. සංගීතය සම්බන්ධ හුදු ප්‍රයුක්ජන කාර්යයෙන් නොනැවතී ඒ පිළිබඳ ව ආවර්ජනා කරන්නෙක් ද, දාර්ශනික ඇසින් විමසන්නෙක් ද වේ. දහස් ගණන් විදග්ධ රසිකයනට උත්තරීතර රසාස්වාදයක් ලබා දීමේ කුසලතාව මතු නොව, තදාස්වාදය කෙබන්දක් ද යන්න ගැන අන්තර්ඥානයෙන් විවිසීමේ නුවණත්, එම විවිසීමේ ප්‍රතිඵල පාඨකයන් හමුවේ තැබීමේ වාග්පටුත්වයත් අමරදේවයන් කෙරෙහි සැබැවින් ම පිහිටියේ ය. පෙරදිග සංගීතය මෙන් ම අපරදිග සංගීතය ද ඔවුන්ට පරිචිත විෂයකි.

දශක ගණනාවක් තුළ රසික සිත් පෙබයූ මේ අසහාය ගාන්ධර්වයාණෝ "නාද සිත්තම්" තුළින් ස්වකීය අත්දැකීම්, අදහස් හා දර්ශනය රසිකයන් අබියස තබත්. අමර ගී සර පරිද්දෙන් ම මෙය ද රසික පාඨක ජනයා ආදරයෙන් පිළිගනිතැයි විශ්වාස කරමි.

මහාචාර්ය හේමපාල විජයවර්ධන