"මොනවට බය වෙනවද...? තරඟයක් නං දිනනවා නැත්තං පරාද වෙනවා... මැරෙන්නෙ නෑ නේ...'' මිතුරන්ට සිනහවක් නැගිණ. චින්තක එවැනි දේ දෙඩුවද. තරගයකට එක්වෙද්දි හොඳින් පුහුණු වෙන්නට යැයි අනික් අයට කෑගසන්නේද ඔහුමය.

තරඟයක් කියන්නේ දිනන්නම ඕන දෙයක් නෙවෙයි... ඒත් අපි තරඟයක් කියන එක තරඟයක් විදියටම තියාගන්න ඕන... ඒකයි හපන්කම... බලාගෙන ඉන්න අයට සතුටු වෙන්න...'

ඔහු නිර්මාංශික නොවුණද, මාළු ආහාරයට ගන්නේම නැත. ඉඳහිට කුකුල් මස් කැබැල්ලක් පමණක් කන්නේය.

'මං මාළුන්ට ආදරෙයි... මාත් පීනන්නෙ මාළුවෙක් වගෙයි නේ... ඉතින් වතුරෙම ඉන්න මාළුවෙක්ව මරාගෙන කන්න තරං මට ආසාවක් නෑ...' ඔහු බොහෝ විට කීවේය. පිහිනන්නට පටන් ගත් දින පටන්ම ඔහු මාළු කෑවේම නැත.