හැව්ලොක්ටවුමේ හරිත පියස

හැව්ලොක්ටවුමේ හරිත පියස (Green School in Havelock Town) කෘතිය අධ්‍යාපනය සහ සමාජ සංවර්ධනය පිළිබඳ සාහිත්‍යයට එක්වන වටිනා දායකත්වයකි. පාසල් අධ්‍යාපනය සහ ප්‍රජාවකගේ සමාජීය ප්‍රගතිය අතර පවතින සමීප සම්බන්ධතාව පෙන්වා දීමේ අරමුණින් මෙම කෘතිය රචනා කර ඇත. දැනුම ලබාදීම පමණක් නොව, තරුණයා පුළුල් ජීවන ලෝකයට පිවිසීමට සහ සමාජයට අර්ථවත් දායකත්වයක් ලබාදීමට සූදානම් වන විට ඔවුන්ට මග පෙන්වීමක් ලබාදෙන ආයතනයක් ලෙස පාසලක අවශ්‍යතා මෙමගින් අවධාරණය කෙරේ.

1952 වසරේදී හරිත භූමිය (Green Land) ලෙස හැඳින්වූ අක්කර හතක භූමි භාගයක ග්‍රීන්ලන්ඩ්ස් විද්‍යාලය (Greenlands College) ආරම්භ වීමත් සමග මෙම පාසලේ ඉතිහාසය ගොඩ නැගීම ආරම්භ වේ. එහි ප්‍රථම විදුහල්පති බී. ඒ. කුරුප්පු මහතාගේ පුරෝගාමී නායකත්වය සහ සාමාජිකයන් හත් දෙනෙකුගෙන් පමණි සමන්විත කාර්ය මණ්ඩලයක සහාය ඇතිව, අධ්‍යාපනය, ක්‍රීඩාව, මානව ශාස්ත්‍ර, සමාජ වටිනාකම් සහ පාසල් ප්‍රජාවේ (පාර්ශවකරුවන්ගේ) සහභාගිත්වය මත පදනම් වූ ශක්තිමත් අඩිතාලමක් පාසල විසින් ගොඩ නගන ලදී. පාසල් ගීතය, ආදර්ශ පාඨය සහ ප්‍රතිඥාව හඳුන්වා දීම මගින් පාසලේ අනන්‍යතාව සහ සංස්කෘතිය තවදුරටත් ශක්තිමත් විය.

"ග්‍රීන්ලන්ඩ්ස් විද්‍යාලය" "ඉසිපතන විද්‍යාලය" බවට පරිවර්තනය වීම සහ කොළඹ ප්‍රමුඛතම පාසලක් දක්වා එය ලැබූ ස්ථාවර වර්ධනය මෙම කෘතිය මගින් මැනවින් විස්තර කෙරේ. දුරදක්නා නුවණැති විදුහල්පතිවරුන්, කැපවූ කාර්ය මණ්ඩලය සහ උනන්දුවක් දක්වන පාර්ශවකරුවන්ගේ දායකත්වය තුළින් මෙම ආයතනය අධ්‍යාපන ක්ෂේත්‍රයේ විශිෂ්ටත්වයට පත්වූ අතර, විශේෂයෙන්ම රග්බි ක්‍රීඩාව තුළ ජාතික මට්ටමේ පිළිගැනීමක් දිනා ගත්තේ ය. රාජ්‍ය සේවය, ව්‍යාපාර සහ ක්‍රීඩා යන ක්ෂේත්‍රවල නායකයන් බවට පත්ව ඇති විශිෂ්ට ආදි සිසුන් හරහා සමාජයට පාසල ලබා දී ඇති සුවිශේෂී දායකත්වය ද කතුවරයා මෙහිදී අවධාරණය කරයි. පාසල සහ ප්‍රජාව අතර පවතින නොබිඳිය හැකි බැඳීම සංකේතවත් කරමින්, රුපියල් මිලියන 680 ක් වටිනා මහල් පහකින් යුත් විද්‍යා ගොඩනැගිල්ල ඉදිකිරීමට දැක්වූ දායකත්වය ඇතුළුව, ආදි සිසුන්ගෙන් ලැබුණු අගනා සහයෝගය අගය කිරීමෙන් මෙම කෘතිය නිම කර ඇත.

සමස්තයක් වශයෙන් ගත් කළ හැව්ලොක්ටවුමේ හරිත පියස (Green School in Havelock Town) කෘතිය යනු තමන් සේවය කරන ප්‍රජාවේ සමාජ සංවර්ධනය සමග දැඩි ලෙස බැඳී පවතිමින් ම, පාසලක් විශිෂ්ටත්වයේ කේන්ද්‍රස්ථානයක් බවට පත්විය හැකි ආකාරය පිළිබඳව ආදර්ශමත් විස්තරයකි.

ජ්‍යෙෂ්ඨ මහාචාර්ය රාහුල අනුර අතලගේ