මං අඹ ගෙඩිය කකා කල්පනා කෙරුවෙම මීනච්චට මොනවා වුණාද කියලා. වලි විල්බා පාන්දරම කොහේ හරි ගියා. මැණිකා කුස්සියේ, රාජා පල්ලෙහා වත්තේ. මට හිතුණා ගබඩා කාමරේ පැත්තට ගිහින් බලන්න ඕන කියලා. හොර අඩි තියලා මම ගබඩා කාමරේ පැත්තට ඇවිදන් ඇවිත් බැලුවේ අලුතින් දාලා තියෙන ඉබ්බා දෙස. ඒක කඩලා හරි මට ඕන වුණේ ගබඩා කාමරේ ඇතුළට යන්න. ඇහෙන මානයක කවුරුවත් පේන්න නෑ. මං දන්නවා මේ වෙලාවට මුරකාරයා ඉන්නෙත් වත්ත කෙළවරේ කියලා. ඒ හින්දා බය නැතුව මම රවුමට හදලා තිබුණ ගල්වැටියෙන් තරමක ගලක් ගලවන් උස්සගෙන ආවා.