ඒ කුටියේ බිත්ති සාදා තිබුණේ ලෑලිවලින්. නමුත් බිම විශාල යකඩ වේදිකාවක් නැත්නම් ද්‍රෝනියක්.එහි තැන්පත් වෙලා තිබුණු දේවල් පරීක්ෂා කර බලන්න මට හිතුණා. ලෝහමය අවක්ෂේපයකින් සෑදුණු කබොල්ලක් එහි තිබුණා. මම පහත් වෙලා එයින් ස්වල්පයක් සූරාගෙන බලන්න හිතුවේ. හරියට ම මොකක්ද කියලා දැනගන්න. එතකොට ම මට ඇහුණා ජර්මන් බසින් කළ කෑ ගැසීමක්. ආපසු හැරී බැලු මා දුටුවේ මළමිණියක් වගේ සුදුමැලි, භීතියට පත් මුහුණෙන් කර්නල් මා දිහා බලාගෙන ඉන්න හැටි.