1980 දශකය දේශපාලනික වශයෙන් ද ආර්ථික වශයෙන් ද එනිසා ම සංස්කෘතික වශයෙන් ද ඉතා සංකීර්ණ වූ විපරිනාමයන්ට භාජනය වූ කාල පරිච්ඡේදයකි. 1970 දශකයේ අවසන් අදියරේ හදුන්වාදෙන විවෘත අර්ථක්‍රමය ආර්ථික ව්‍යුහය පමණක් නොව ඒ හා බැඳෙන සමාජ ව්‍යුහය ද තුළ සිදු කළේ විප්ලවීය පරිවර්තනයකි. විවෘත අර්ථක්‍රමයේ සාධනීය ලක්‍ෂණ මේ අවදියේ ම භුක්ති විඳින්නට අවකාශ සැලසෙයි. එමෙන් ම ස්වයං පෝෂණය අරමුණු කරගත් දේශීය ව්‍යවසායකයන්ට මුහුණ දීමට සිදුවන අර්බුදයත් එහි දීර්ඝකාලීන ප්‍රතිඵල ලෙස ආර්ථිකය මුහුණදෙන පසුබෑමත් පිළිබඳ මූල ලක්‍ෂණ ද මේ අවදියේ ම අත්විඳින්නට ලැබේ.