දිවුරුම් ප්‍රකාශ යනු නීති ක්‍ෂේත්‍රයේදී මෙන්ම එදිනෙදා ජීවිතයේ බොහෝ කටයුතු වලදී ද නිතර භාවිත වන නීතිමය ලියවිල්ලකි. ඒ සම්බන්ධ නීතිය හරිහැටි නොදැනීමෙන් අගතියට පත්වන සේවා දායකයින් නිතර නගන මැසිවිලිද, බොහෝ ප්‍රත්‍යන්ත ප්‍රදේශවල නීතිඥවරුන්ගේ ඉල්ලීම මතද සිංහලෙන් මෙම නීති ප්‍රදේශය පිළිබඳ ග්‍රන්ථයක් නොමැතිවීමේ අඩුව පිරිමැසීම සඳහා ද මෙම ග්‍රන්ථය සම්පාදනය වීමට හේතු විය. මෙහි දිවුරුම් ප්‍රකාශ වල ප්‍රයෝජනවත් භාවය, ඊට අදාල ව්‍යවස්ථාපිත නීතිමය ප්‍රතිපාදන, දිවුරුම් ප්‍රකාශයක් දීමේ හැකියාව ඇත්තේ කාටද, එවැන්නක් සහතික කළ හැක්කේ කාටද, විධිමත් දිවුරුම් ප්‍රකාශයක අන්තර්ගත විය යුතු කරුණු අවධිමත් හෝ ව්‍යාජ දිවුරුම් ප්‍රකාශක ප්‍රතිඵල, දිවුරුම් ප්‍රකාශයක් සහතික කරන්නාගේ හෝ සංශෝධනය කරන්නාගේ කාර්යභාරය, ආගම දිවුරුම් ප්‍රකාශවලට බලපාන අයුරු, නඩත්තු නඩු, ඡන්ද පෙත්සම් නඩු 66 වගන්තියේ නඩු, මූලික අයිතිවාසිකම් නඩු වලදී දිවුරුම් ප්‍රකාශ භාවිත වන ආකාරය සහ ශ්‍රේෂ්ඨාධිකරණ රීති දිවුරුම් ප්‍රකාශවලට බලපාන ආකාරය යන සිංහලබසින් වන පරිච්ඡේද 11 ක් ද, විවිධ දිවුරුම් ප්‍රකාශ ආකෘති කිහිපයක්ද ඇතුලත් මෙම ග්‍රන්ථයේ මෙම මාතෘකාවට අදාලව 2017 මැයි මස දක්වා යාවත්කාලීන කළ ඉංග්‍රීසි බසින් වන විනිශ්චිත නඩු තීන්දු 153 කින් සමන්විත උප ග්‍රන්ථයක්ද ඇතුළත් ය.

මේ නිසා මෙම ග්‍රන්ථය නීති වෘත්තිකයන්ට, නීති සිසුන්ට හා නීතිය පිළිබඳ උනන්දුවක් දක්වන සාමාන්‍ය පාඨකයන්ටද එකසේ ප්‍රයෝජනවත් වන සරල සිංහලයෙන් ලියැවුණ නීති ග්‍රන්ථයක් ලෙස හැඳින්විය හැකිය. වර්ෂ 1996 දී කොළඹ විශ්ව විද්‍යාලයේ නීති පීඨයෙන් නීති වේදී උපාධිය දිනාගත් මෙම ග්‍රන්ථයේ කතුවරයා මානව හිමිකම් ආයතනය මෙහෙය වූ ජාත්‍යන්තර මානව හිමිකම් නීති පිළිබඳ පශ්චාත් උපාධි ඩිප්ලෝමා පාඨමාලාවේ ඩිප්ලෝමාධාරියෙකු ද වේ. සිවිල් අධිකරණ වල නඩු කටයුතු සඳහා පෙනී සිටින නීතිඥවරයෙකු සහ JMC (ජයසේකර කළමනාකාරණ මධ්‍යස්ථානයේ) ව්‍යාපාර නීතිය පිළිබඳ බාහිර කථිකාචාර්යවරයෙකු ලෙස ද කටයුතු කරන මෙම ග්‍රන්ථයේ කතුවරයා වන නීතිඥ කපිල ගාමිණී ජයසිංහ මීට පෙර සිංහලෙන් නීති ග්‍රන්ථ 30 ක් ලියා පළකර ඇති අතර ඒවා නීතිවේදීන් අතරත් සාමාන්‍ය පාඨකයන් අතරත් අතිශය ජනප්‍රිය විය මෙම දිවුරුම් ප්‍රකාශ නීතිය ඔහුගේ 31 වන නවතම නීති ග්‍රන්ථයයි.