" ජූලිහත " ආදි ම මුද්‍රණය 1943 වැන්නේ දී විය. එ විට, සංඥාපනයක වශයෙන් යමක් ලිවීම වුවමනා නො කෙළේ, මෙ වැනි පොත්, එ වැනි සංඥාපත මාර්ගයෙන් නොහොත් අන්‍යයන් ලවා ලියැවෙන ප්‍රස්තාවනා මාර්ගයෙන් හඳුන්වා දීම නොව, ගත් කරු විසින්, පොතෙන් ම කියවන්නාට පොත හැඳිනෙන මෙන් සැලැස්වීම, අවශ්‍යයෙන් කළ යුතු වූ හෙයිනි. ඒ අපගේ අදහස ලෙසින් ම, "ජූලි හත” එම කියවන්නාට තමන් කවුද යන්න හඳුන්වා දුන්නේය. ඒ හෙයින් ම, මුද්‍රණද්වාරයෙන් නික්මෙනුවාත් සමග පළමු වැන්නේ පිටපත් සියල්ල විකිණී ඉවර විය.