මෙහෙම මංගල්ලයක් ලෝකයේ කවර තැනකවත් සිදු ව තිබේ ද? මංගල මධුසමයට පෙර මනාලයාගේ දෙපා අල්ලා වැඳ, මනාලිය සිය ප්‍රේමවන්තයා වෙත යන්නට අවසර ඉල්ලූ මංගල්ලයක් ලොව කොතනකවත් සිදු ව තිබේද? කුරුලුගේ පිරිමි පපුව ඇතුළේ, පිටව යන්නට පොරබැදු සුසුමක් විය. නමුත් ඔහු ඒ සුසුමට පිටවෙන්නට ඉඩ නුදුන්නේය. කුල ගෙදරින් නික්ම යන්නට අවසර ඉල්ලන මනාලිය ඉදිරියේ කොහොම සුසුම් හෙළන්නද? සමාජය විසින් පරම්පරා දහස් ගණනක් තිස්සේ උගන්වා තිබෙන්නේ පිරිමියෙක් එහෙම නොකළ යුතු ලෙසටය. පිරිමිකම කියන්නේ එයටය.