"දැන් ඔයා මගේ පිටේ එල්ලිලා මාව හයියෙන් බදාගන්න.” එරිකා බියෙන් ගැහෙමින් එසේ කළා.

මාගරි රෙදි ලණුව දිගේ සෙමින් සෙමින් ඉණිමඟ වෙත බහින්න පටන් ගත්තා. පහළ සිටි අය මාගරිගේ වික්‍රමය බලා සිටියේ පුදුමයෙන්, විමතියෙන්.

"හරියට චිත්‍රපටයක් වගේ” ඉසබෙලා කීවා.

ඉණිමඟ වෙත පැමිණි මාගරි ප්‍රවේශමින් රෙදි ලණුව අතහැර සෙමින් සෙමින් ඉණිමඟ දිගේ පහලට බහින්න වුණා. ''පරිස්සමින් මාගරි” විදුහල්පතිනිය කෑ ගැසුවා. ඉණිමගේ බාගයක් පමණ බැස්ස මාගරිට සිදුවුණේ අකරතැබ්බයක්. ඇයගේ අත අතහැරුණා.