ආගම් ඊයම් බරු බැඳී

ළපැටි දෙපා පද්ද පද්ද

සංසාරේ දිගට දිගට තව යනව ද

මළ දෙනටත්

ඉඩක් නිදහසක් හුස්මක් ගන්න නොදී,

සොහොන් කටෙත් පිට්ටනියෙත්

දුම් රොටුවෙත්

කතිර ලකූණු අඩහඳ, තරු ධර්මචක්‍ර

යටි ගිරියෙන් මොර දෙනව ද

වෘක නිය පසුරු උල් දත් නියවනව ද

මළ කකුලෙන් අතින්

රෙදි පොටින් අල්ලා හොලවනව ද

අහස ඉරන්-පොළව පළන්

දිගට ම දිගට ම යන විට

අතරමගදිවත් නිදහස හමුවෙනව ද

නැත්නම් මක්කම හරියෙදි

ජෙරුසෙලමෙ දි ලුම්බිණියෙ දි

විරාමෙකට නවතිනව ද

ආගම් ඊයම් බරු බැඳී

ළපැටි දෙපා පද්ද පද්ද

සංසාරේ දිගට දිගට තව යනව ද