පුංචි කාමරේ

කොල්ලන්ටත් වඩා කොලු විදියට හිතන
කවදත් සෙන්ටිමෙන්ටල්මය පද ගොතන
ලිව්වොත් එකක් සැක නැත බඩු හිටි නිතින
ගී රචනා කුලේ ඔහු විය දමිරතන

ධර්මෙගෙ ගී අතර අමතක කරනු බැරි
තිබුණා පුංචි කාමරයක් සුවඳ පිරි
මේ වගෙ ලිවිලි කිට්ටුයි හදවතට හරි
තව විදියකට කිව්වොත් අම්මටමසිරි

ඒ කාමරේ ගැන ඇති තතු නම් බෝය
සනතුත් මේක කිව්වේ තරඟෙකූ සේය
හොඳටම සුවකරපු කොලු අපෙ ගී ගාය
මේ අපෙ යොවනේ සිග්නේචර් ගීය

අද මෙන් හෙටත් අතිශය මිහිරක් ගේන
තව සින්දුවක් ගැන පවසන්නම ඕන
අද අප අතර නැතිමුත් සූරියසේන
මතකයි පියාසැලූ ඒ ලිහිනින් රෑන

නමසිය අනූවේ ඒ රන්වන් සමය
ගත්තොත් දශකයක් ලෙස එය ප්‍රියතමය
ධර්මෙත් එදා ලිව්වෙම ගීවල පෙමය
ගොඩගියෙ ධර්මෙගෙන් නාමල් උඩුගමය

ඒ සංයෝගෙ ගමනද සෑහෙන දුරය
ගීවල නොවුණි උන් වයසෙහි පරතරය
අප හමුවීම වෙන්වීමද ආදරය
කියලා ලියපුවට තාමත් කෑදරය

පැණි දවටමින් ධර්මේ ගී පද බැන්දේ
මේ ටික කාලයට පොඩි නෑ ඔහු දුන් දේ
කවුරුත් වගි වී වගෙමය රසවින්දේ
ගයනා විටදි චන්දන නිල් වන ලන්දේ

ඇත තව ගීතයක් අපෙ ආතල් වැඩුව
ඒ ගැන නොකිව්වොත් හෙම ඒකත් නඩුව
මනමාලියකි පිරවු ගී ලොව අඩුව
පුරමින් පාරමී ගෙන ආ වැලිතුඩුව

ලිව්වේ මෙතන ගී තතු ඩිංගක් පමණී
තියෙනවා තව ගොඩක් ගමනෙහි ඔහු පැමිණී
සිංදුත් එක්කලා නිරතුරුවම හැමිණී
ලියූ ගී අපේ දෙසවන් තුළ ඇත ඇමිණී

- ප්‍රියන්ත කොඩිප්පිලි