සමනල තටුවක් විකිණිමට

මේ කුඩා සිර කුටියෙහි 

විසල් ලෝකයක් තිබේ 

මගේ සිත තුළ

ගමේ වෙල් දෙණි වල

හෙලුවැලි දෙපයින් දිවයන 

කුඩා කොලුවෙකි මම

ගලහ පාරේ වැස්සට

ඈ තුරුල් කරගෙන ඇවිදින 

බොඳ සිතුවමකි මම

පොඩි දූ වඩා ඔසවා

පෙරහැරේ නැටුම් පෙන්වන 

ආදර තාත්තා මම

මධු සාදයක මැද

ජෝතිගෙන් ඔබ පිනවන 

ගී ගයන භෘංගයා මම

ෆ්‍රොයිඩ්ගේ සිහිනයෙන්

සිසු විමසු ගැටලු පහදන 

ඇදුරු මිතුරා 

එසැණ

දිගු කරන විට මා බිරිඳ 

බෙහෙත් පෙති සහ වතුර 

ඈ අණට කීකරුව ඒ විසල් ලෝකයෙන් බැස යන

සිරකරුවෙක්මි මම