කාවන්තිස්ස වැඩපිළිවෙල

අද අපිට ඕන මිනිස්සු බෙදන මතවාද නෙවෙයි. අද අපිට ඕන මේ බෙදිලා ඉන්න ජාතිය එකතුකරන මතවාද. මොන මොන අදහස් ඔළුවේ තියාගෙන හිටියත් අපි හැමෝ ම මේ රටේ මිනිස්සු. මේ තමයි අපි හැමෝට ම සතුටින් නිවිහැනහිල්ලේ ඉන්න පුළුවන් බිම. මොන සැප සම්පත් හොයාගෙන මේ රටෙන් පිටවෙලා ගියත් අපිට සිද්දවෙන්නේ වෙනත් සංස්කෘතික පරිසරයක තනිවෙන්න, අතරමංවෙන්න. ඉතින් මොන විදිහකින් හරි අපේ තියෙන මේ අඩුපාඩු හදාගන්න පුළුවන් නම් අපි හැමෝට ම එකට වැටිලා සතුටින් ජීවත්වෙන්න විදිහක් හොයාගන්න බැරිකමක් නෑ.

කාලාන්තරයක් තිස්සේ ඇතිවෙච්ච ප්‍රශ්න දවසින් දෙකකින් විසඳන්නත් බෑ. ඒ වගේ ම, අතනින් මෙතැනින් අල්ලගෙන වලිකාලා මේ තියෙන අවුල් තව තවත් වැඩි කරගන්නත් බෑ. අපිට ඕන දීර්ඝ කාලීන, විධිමත්, සැලසුම් සහගත වැඩපිළිවෙලක්.

ඉතින් මේ විදිහේ ජාතිය එකතුකරන, යෝධයෝ හදන, අපේ මිනිස්සු ආර්ථික වශයෙන් සවිමත් කරන කටයුත්තක් කාවන්තිස්ස වැඩපිළිවෙලක් කියලා නම් කරන්න පුළුවන්. මේ පොතෙන් ඉදිරිපත් කරන්නේ ඒ වගේ වැඩපිළිවෙලකට උවමනා කරන මූලික කාරණා කිහිපයක්.