මාරක ළිඳේ සවාරියක්

'මාරක ළිඳේ සවාරියක්' මෑත කාලීනව මා දුටු ඉතාම ඉහළ ගණයේ නාට්‍ය නිෂ්පාදනයක්. මූලික වශයෙන් ලංකාවේ වේදිකාවට නුහුරු පාඨාන්තරීය සම්බන්ධතාවයක් මේ නාට්‍යයේ තියනව. එම කෘතිය එම කෘතියෙන් පිටත තිබෙන තවත් දාර්ශනික සමාජ දේශපාලනික කෘතියක් සමග සම්බන්ධතාවක් පවත්වනවා. 'මාරක ළිඳේ සවාරියක්' ලංකාවේ වැඩියෙන්ම අලෙවි වෙලා තියන ගම්පෙරළිය කෘතිය එක්ක පාඨාන්තරීය සම්බන්ධයක් තියන නාට්‍යයක්.

පියල්, ජිනදාස, නන්දා, මේ චරිත කාලාන්තරයකට කලින් හමු වූ චරිත. චාලක විසින් ඔවුන්ව එතැන සිට මේ යුගයට අරගෙන එනවා. ධනේෂ්වර කරණය සිදු වූ යුගය තුළ ජීවත් වූ චරිත අද අපි ජීවත්වන පාරිභෝගික ප්‍රදර්ශනවාදී ධනේෂ්වර ක්‍රමයේ අමු ලිබරල්වාදය නැත්නම් ධනේෂ්වර ක්‍රමයේ විනෝද සයුරේ ගිලිලා ඉන්න යුගයට. මනුෂ්‍යත්වයේ සාරය සම්පූර්ණයෙන්ම අහිමි කර ඇති කාලකණ්ණි යුගයට චාලක නන්දාව ජිනදාසව නැවත ගේනවා.

ජිනදාසගේ මිනිය වැළලුවේ මගේ සල්ලිවලින් කියලා පටන්ගත්තු ඒ සාහිත්‍ය ඉතිහාසය ඇතුළේ ධනේෂ්වරය ගොඩනැගූ පියල්, සිංහලේ ගිහිං කැලෑ උණ හැදිලා මැරිච්ච ජිනදාස, අද කොහොමද අපේ ජීවිත ඇතුළේ ඉන්නේ. ඒ විදිහටම පියල් කෙනෙකුත් ඉන්නේ.

මේ කාලකණ්ණි ප්‍රදර්ශනවාදී ධනවාදයට, නව ලිබරල්වාදයට මනුෂ්‍යත්වයේ සාරය විනාශ කරපු සංස්කෘතියට තියන විරෝධය සාපය මේ නාට්‍ය ඇතුළෙ තියනවා. ඒ සාපය වෙනුවෙන් මම චාලකට හිස නමා ගරු කරනවා, ඒ සාපයත් කුවන්නාගේ සාපය වගේ දිගින් දිගටම නගන්න පුළුවන් කලාකරුවන් අද අපිට අවශ්‍යයි.

කේ. කේ. සමන්කුමාර