මේ නවකතාව තුල එක් පසෙකින් දිවෙන අනුරාගික 

පළිගැනීමේ කතාන්දරයකට තවත් පසෙකින් දිවෙන

අහිමිවීම්වල දොම්නසේ කතාවක් මුණගැසී නොගැසී යයි.

නව අනගාරික මධ්‍යම පංතියේ ජීවිතයට අගනගරයට

සංක්‍රමණය වූවන්ගේ ජීවිතය මුණගැසී නොගැසී යයි.

මෙවැනි හමුනොවන හමුවීම් සමුදායක කුරිරු

සෞන්දර්යයෙන් මේ කෘතිය රාමුගත වී ඇත. කොළඹ

ලෝක වෙළඳ මධ්‍යස්ථානයේ තිස් හය වන තට්ටුවේ සිට 

නගරය දකිමින් ඒ මතට පහත් වන බැල්මක් මේ දැන්

එතැනින් ඉවතට ඇදී යන KIA ජීප් රථයක් පසුපස හඹා 

යන අතර නවකතාව දිගහැරෙන්නේ රිය පදවන තරුණ

මානව සම්පත් කළමනාකාරවරයාගේ අති පුද්ගලික 

ජීවිතය වෙත එබෙමින් ය. සිනමාත්මක සාහිත්‍ය

අත්දැකීමක් ලබා දෙමින් සමකාලීන ලංකාවේ මිනිස්

ජීවිතයේ සූක්ෂමතා නිරාවරණය කරන්නට උත්සාහ කරන 

මෙය හරුකි මුරකමි ගේ After Dark නවකතාවේ ආඛ්‍යාන

ශෛලිය සිහිපත් කරවයි.