මගේ මුල්ම කෙටිකතා එකතුව වන කාලිදාස කල් ඉකුත් වී නැත පොත මා හැඳින්වූයේ වියපත් රුකෙක අලට පිපුණු මල් කැකුළක් කියා ය. එයටද ඉන් පසුව ලියැවුණු මේ ගඟ ගලන්නේ උඩහටය. පොතටද ලැබුණු ප්‍රතිචාර නිසා මම මහත් සේ ප්‍රාමාදයට පත් වුණෙමි. අසූ විය ඉක්මවා සිටින මා අතින් දැන් මේ ලියැවෙන කතා අකලට පිපුණු මල් ලෙස හඳුන්වන්නට දැන් මගේ කැමැත්තක් නැත.
මේ කෙටිකතා ලියන්නට මා පෙළඹවූ හේතු අසන අයට මට කියන්නට ඇත්තේ මම කුඩා කල සිටම කතාන්දර කියන්නෙකුව සිටි බවත් වයස වැඩිකම නිසාදෝ දැන් පෑනක් අතට ගත් සැණින් මේ කතා මටත් නොදැනී ලියැවෙන බවත් ය.