සැනසුම් සුසුම්

"ඒ වුනාට මෙතන රිදෙන එක මට නවත්ත ගන්න අමාරුයි.”

මොහොතකට යශෝධාට ඉහලට ගත් හුස්ම පහලට හෙලන්නට අමතක වුනා. තමන් ඔහුගේ නොවෙන බවත් ඔහු තමන්ගේ නොවෙන බවත් අමතක වුනා. ඔවුන් දෙදෙනා හැරෙන්නට තවත් ලෝකයක් ඇති බව අමතක වුනා. යන්තමින් රැවුල් ගස් වැවී ඇති මුහුණ මතින් පාත් වී යශෝධාගේ බැල්ම මාලකගේ ලයේ වම් පස නතර වී ඇති දබරැඟිල්ල මත නතර වුනා. ඒ දබරැඟිල්ල ඉවත් කර එතනම දෙතොල් තබන්නට යශෝධාට උවමනා වුනා.

නාන තටාකය අසල සිටි අයෙක් 'ජබුක්' ගා තටාකයට පැන්නේ ඒ මොහොතේ.

තිගැස්සී ගිය යශෝධා පියවරක් පසුපසට ගත්තේ නැවත බැල්ම මාලකගේ මුහුණ මතට යොමමින්.

"මාලක, මම ඔයාට කලිනුත් කියලා තියෙනවා ඉවර වෙච්ච කතා ආයේ පටන් ගන්න බැහැ කියලා.’