සබ්ටරේනියන්

ඇන්ටාක්ටිකා මහාද්වීපයේ ගැඹුරු අභ්‍යන්තරයට වන්නට, අයිස්වලට යටින්, දැවැන්ත ගුහා සංකීර්ණයක් හමු වේ. එහි තිබී ආදිකල්පික ප්‍රතිමාවක් සොයාගැනීමත් සමඟ, ගුහා සංකීර්ණය ගවේෂණය කිරීම සඳහා සුවිශාල ව්‍යාපෘතියක් යෝජනා වේ. ඇෂ්ලි කාටර් ප්‍රමුඛ විවිධ ක්ෂේත්‍රයන්හි නිපුණ විශේෂඥයන් කණ්ඩායමක් ඇන්ටාක්ටිකා පොළෝ පතුළෙහි පෙර කී ගුහා වෙත පිවිසුණේ එලෙසිනි.

ගවේෂණය අරඹන විද්‍යාඥයන් පිරිසට, භූගත ලෙන් පද්ධතිය තුළ සිටිනුයේ තම පිරිස පමණක් නොවන බැව් වැටහෙන්නට වැඩි කලක් ගත නොවීය. මිනිස් දඩයම ඇරැඹී තිබිණ. අද්භූත සත්ත්ව ප්‍රහාරයකට ලක්වී ඔවුහු එකිනෙකා මියැදෙන්නට පටන්ගත්හ. මෙකී ජීවීන්ගෙන් ගැලවීමට සමත් වන කිහිපදෙනෙක් පමණක් මෙතෙක් නොදුටු අද්භූත ප්‍රදේශයකට පැමිණීමට සමත් වෙති. පරිණාමීය ක්‍රියාවලියේ අතරමං වූ ආදිකල්පික මිනිසුන් වෙසෙන එම ප්‍රදේශයේදී ඔවුන්ට මුහුණපෑමට සිදුවන ඉරණම කුමක්ද? ඇෂ්ලි ප්‍රමුඛ පිරිසට, එම ජීවීන්ගෙන් එල්ල වන අභියෝග ජයගනිමින් තම දිවි රැකගැනීමට හැකිවේද?