බාලේ සිට යව්වනයට

ලියෝ ටෝල්ස්ටෝයි (1828 -1910) Childhood, Boyhood, Youth කෘතිය රචනයෙහි නියැළෙන විට ඔහුට යන්තම් වයස විස්ස පිරුණා පමණි. පසුකලෙක දී ඔහු මෙය ප්‍රබන්ධ සහ යථාව අතරමැද තත්වයක පවතින නොපැහැදිලි සටහනක් ලෙස සඳහන් කර තිබුණ ද අද එය ඉතා අරුත්බර වාචික ස්වයං ආලේඛයක් ලෙස පිළිගනු ලැබ ඇත. යුද්ධය හා සාමය, ඇනා කැරනිනා වැනි අමරණීය ග්‍රන්ථ ලෝක සාහිත්‍යයට දායාද කළ දාර්ශනික ලේඛකයාගේ,සදූප දේශකයාගේ, මිනිසා සහ සොබාදහම පිළිබඳව ඉවසුම් නෙතින් විමසා බැලු පරීක්ෂකයාගේ, හුදී ජනතාව කෙරෙහි අනුපමේය සානුකම්පාව දැක්වු අසාමාන්‍ය වංශාධිපතියාගේ සහ ජීවිතයේ අවසන් භාගයේහි දී සියලු යස ඉසුරු හැර දමා ගොසින් පාලු දුම්රිය පොළකදී අවසන් හුස්මපොද පිටකළා වූ අසරණයාගේ කලලාංකුරය මෙම නිර්මාණය තුළින් නොඅඩුව පිළිබිඹු වන්නේය.