“ඒ දවස්වල ‘කපාලතුඩුව’ කියල එකක් තිබුණෙ නැහැ. ඊට අවුරුදු කීපයකට පස්සේ වැටිච්ච නමක් ඒක. නගරය ගොඩනඟද්දී මිනී හිස් කබල් හතරක්ම එක දවසෙ මතුවුණ නිසයි මේක ‘කපාලතුඩුව’ වුණේ. ඉතිං එදා අපි ටික දුරක් යනකොට ඉදිරියෙන් ආ තැනැත්තෙක් කෝච්චිකාරයාට අනතුරක සංඥාවක් දුන්නා. පිරිස හොඳටම බය වුණා. බයවෙලා වස්තුව කොහේ හරි සඟවා යාමට කතාකර ගත්තා.”

“කවුරු නමුත් ඔත්තුවක් දෙන්ට ඇතැයි ඔවුන් සිතා ගත්තා. යම්කිසි කලබලයක් වුණොත් කෝච්චියේ තට්ටුව යට දිග ඇදෙන්ට ඔවුන් මට අවවාද කළා.”

“අපිට වැඩිදුර යන්ට ලැබුණෙ නැහැ. මට තට්ටුව යට දිග ඇදෙන්ට ලැබුණෙත් නැහැ. වෙඩි හඬක් ඇසුණා. ඒ සමඟම කෝච්චිකාරයා මැරී වැටුණා.”