කලින් ක්ෂිතිජය හා එක්ව තිබූ කළු පොදිය දැන් මෑත් වන බවත් අහසට නඟින දූලි කන්ද මුළු පළාතට ම පැතිරී යන බවත් ඔවුහු දුටහ. තවත් මිනිත්තු කීපයකින් හරක් කුර පොළොවට වැදීමෙන් නැඟෙන ගිඩි ගිඩිය තරුණ තරුණ යුවළට දැනෙන්නට විය. යළි වෙඩිහඬ සමඟ මුසු වූ හරකුන්ගේ කෑගෑමත් ‘ගිඩි ගිඩි’ යත්, උන් කුලප්පු කරමින් පන්නන මිනීමරු වෙසින් කෑ ගහන අසරුවන්ගේ හඬත් පැහැදිලිව ම ඇසෙන්ට විය. මුහුද ගොඩගමන් ගත් කළැයි කියනු ලබන්නේ මෙවැනි අවස්ථවලට යයි ඔවුන්ට සිතුණි. හිස් නමාගෙන ඉදිරියට නෙරාගත් අං ඇතිව වල්ගා උඩ තබාගෙන ප්‍රාණ බයෙන් දුව එන දැවැන්ත ගව රැළ, ගස් ගල් හා වල් පඳුරු සුනුවිසුනු කරමින් වෛරයෙන්, කෝපයෙන් හා බියෙන් මත්වූ සෙබළ මුළක් මෙන් ඉදිරියට එමින් සිටියහ. පිස්තෝල හිසට උඩින් ඔසවා ගත් ගවපල්ලෝ උන් මෙහෙයවන නපුරු සෙනෙවියන් රැසක් මෙන් අහසට වෙඩි තබමින්ද, යටිගිරියෙන් කෑ ගසමින්ද එක් අතකට ම මෙහෙයවමින් සීසීකඩ යා නොදී පාළනය කරමින් ආහ. තරුණයා රයිෆලය අතට ගත්තේය. බිම දිගා වී, තරුණියටද එසේ කිරීමට අණ කළේය. ඇය ඔහු අනුගමනය කළ මුත් ඔහුගේ බලාපොරොත්තුව කුමක්දැයි යන්න ප්‍රහේලිකාවක් විය.