අහිමි හිමි අහිමි

එක් දිනක හැන්දෑවේ නන්පෙරියල් වතුයායට යන පාරේ පොලිස් ජීප් රථයක් නැවතුණි. ඉන් බැසගත් පොලිස් නිලධාරීන් පස් දෙනෙකු කඩිමුඩියේ තේගිස් මාමාගේ නිවස දෙසට දුව එනු මිදුලේ සිටි තේගිස් මාමාත්, කරුණා නැන්දාත් දුටුවෝය.

ඔවුන් නිවසට ළං වත්ම, "උඹ නේද තේගිස් කියන්නෙ? ඔහෙ හිටු පරයා!" කියමින් ඔහු ඇල්ලීමට සැරසෙත්ම නිවසේ පසුපස දොරෙන් තේගිස් මාමා පැන දුවන්නට පටන් ගත්තේය.

පොලිස් නිලධාරීහුද තේ වත්ත හරහා දුවන තේගිස් මාමාගේ පසුපසින් එළවන්නට වූහ. මෙසේ දුවන තේගිස් මාමා පය පටලැවී කන්දෙන් පහළට ඇද වැටෙනු පොලිසියේ අය දුටුවෝය. ඔවුන් ඉක්මනින් තේගිස් මාමා වැටී සිටි ස්ථානයට ආවෝය. ඔවුන්ට දක්නට ලැබුණේ ගලක හිස වැදී නහයෙන් කටින් ලේ දමමින් සිහිසුන්ව සිටි තේගිස් මාමාය.