හෙන්රි මෙරිල් පාපැදියෙන් ලංකාවේ සිට ලන්ඩනයට

වයස 19 ක් වැනි වූ නිර්මල් වයසේදී මව්පියන්ගෙන්, නෑදෑ හිතමිතුරන්ගෙන් පමණක් නොව මව්බිමෙන්ද වෙන්වී ලංකාවේ සිට ලන්ඩනයට අවදානම් පාපැදි ගමනක යෙදුණු හෙන්රි මෙරිල් ප්‍රනාන්දු වීරයෙකි. ඔහු බ්‍රිතාන්‍ය රාජකීය ගුවන් හමුදාවේ රැකියාවක් සොයා අනාගතය වෙනුවෙන් මෙවන් අවදානම් ගමනක යෙදුනා යැයි කීවද එය සම්පූර්ණ සත්‍යය නොවේ.

එසේ නම් පා පැදියක නැගී නොදන්නා රටවල් මෙන්ම නාඳුනන මිනිසුන් සමග ගැවසෙමින් ගිරි දුර්ග, ජල දුර්ග, කාන්තාර පසු කරමින් මෙවන් අවදානමක් ගතයුතු නැත. ඔහුට ආයුධ සන්නද්ධ මංපහරන්නන්ගෙන් මිනීමරුවන්ගෙන් පමණක් නොව අලින්, සිංහයන්, කොටින්, වෘකයන් වැනි සතුන්ගෙන්ද ජීවිතය බේරාගත යුතු විය. කුසගින්නෙන්, පිපාසයෙන් පීඩිතව කාන්තාරවල වැලි කුණාටුවලට මුහුණ දෙමින් ජීවිතයේ අන්තිම බලාපොරොත්තුවද බිඳ වැටුණු අවස්ථාවලට ඔහු මුහුණ දුන්නේය.

එහෙත් ඔහු බලාපොරොත්තුව අත් නොහැරියේය. මේ නව යොවුන් තරුණයකුගේ ධෛර්යයේ කතාවයි. දැනට 87 වැනි වියේ පසුවන හෙන්රි මෙරිල් ප්‍රනාන්දු අතීත වීරක්‍රියා ගැන සතුටු වෙමින් තම ත්‍රාසජනක අත්දැකීම් නව පරපුරට බෙදා දෙන්නේ මොන බාධක පැමිණියත් අරමුණ අත්නොහැරිය යුතුය යන පණිවුඩයද සමාජයට ලබා දෙමිනි.