සුමන ධර්ම ලෙනෙන් බැස මහ හිමය ඔස්සේ පහළට ගමන් කළා. වනය මැදින් ගලා බසින ගංගාවකට බැසගත් ඔහු ජලය තුළ වැතිර ගෙන මුළු මහත් වනාන්තරයම සමඟින් සම්බන්ධ වුණා. කුරුල්ලෝ ගී ගයමින්, සුමන දෙස බලමින් ඉහළින් පියාසර කළා. මඳ සුළඟත්, ඒ ඔස්සේ හමා එන මල් සුවඳත් සුමනට මේ වනාන්තරයේ අලුතින් දළු ලෑ ගස්වැල් ගැනත්, අලුතින් බිහි වූ සතුන් ගැනත් පණිවිඩ ලබා දුන්නා. මුළු මහත් ජෛව පද්ධතියම සුමන තුළත්, සුමන මුළු මහත් ජෛව පද්ධතිය තුළත් එකක්ම බවට පත්ව තිබුණා.