කෙසේ හෝ තම අරමුණ මුදුන්පත් කර ගැනීමේ අධිෂ්ඨානයෙන් වියරු වැටුණු විට ඇතැමෙකුට තමන් දරනා සමාජ තත්වය අමතක වෙයි. යුතු අයුතුකම් සිහියට නොඑයි. බිය සැක සමාජ නිග්‍රහ යන සියල්ලට පිටුපා ඉතා දීන ලෙස ක්‍රියා කිරීම එබඳු පුද්ගලයින්ගේ සිරිත වෙයි. මොවුහු රතු එළි සංඥා නොතකා යන රියදුරන් මෙනි ඇතැම්විට අනතුරට ලක් වී රියදුරා දිවි ගළවා ගනිතත් ඔහු සමඟ ගමන් ගන්නා අනෙකා මිය යයි. රිය පදවන සීතා නමැති බිරිය සමඟ ගමන් ගන්නා ධනපාලට හෝ ඇයට අත්වන ඉරණම ගැන විමසා බැලීම ජයකොඩි සෙනෙවිරත්නයන්ගේ උරචක්‍රමාලයෙහි අරමුණ වී ඇති කිව හැකිය.